خورشید ضیا بار
آج وہ قربِ الہی میں بڑ ے چین سے ہے ! // حق پہ جاں دے کے اس انعام کا حقدار ہوا // اسکی تربت پہ دل افگاروں کے بے پایاں سلام ! // قبر میں سو کے بھی جو قبلۂ احرار ہوا !!
ID: 40693
|
Date: 2015/08/14
آہ ! جب جانِ چمن کو چ پہ تیّار ہوا
حشر سے پہلے عجب حشر نمودار ہوا
چشمِ مایوس میں دھندلاگیا منزِل کا نشاں !
جب جدا قافلے سے قافلہ سالار ہوا
شاخِ گل ٹوٹ گئی خاک نشیں پھول ہوئے
قصرِ تو قیرِ چمن لمحوں میں مسمار ہوا
آئے پیمان ِ وفا باندھنے مرغانِ چمن !
رہبرِ عشق کا یوں آخری دیدار ہوا
آنسوؤں نے کی ادا اس کی نمازِ رخصت
غم کے طوفان میں وداعِ دُرِ شہوار ہوا
بزم لاہوت سے جب آگیا پیغامِ وصال !
دوش عشّاق براق سفرِ یار ہوا !
ہوئی تاریک زمیں ، محفلِ انجم اجڑی
کہ نہاں خاک میں خورشیدِ ضیائ بار ہوا
دردِ دل شبنمِ مغموم کا اب پوچھے کون !
گلستاں آج سے بے مونس و غمخوار ہوا
بُلبلیں پھرتی ہیں غمگین و سراسیمہ حال!
غارضِ گل بھی نگاہوں کے لئے خار ہوا
لذّتِ زیست گئی ، ہوگئی دنیا ویراں
سوگوار اپنے ہوئے غیر عزادار ہوا
کس کا عاشق تھا کہاں چھوڑ کے وہ ہم کو گیا
کس پری دَش کا وہ اب محرمِ اسرار ہوا
جنبشِ لب پہ فدا کے خود اِک عالَم تھا
خالِ لب دیکھ کے ، وہ کِس کا گرفتار ہوا
جس کی آنکھوں میں خود اعجاز مسیحائی تھا
چشمِ بیمار کا کس بُت کی وہ بیمار ہوا
کس کی ہستی میں فنا کردیا اُس نے خود کو !!
کھوکے وہ دولتِ جاں کِس کا خریدار ہوا
کیوں ’’ انا الحق‘‘ کا ترانہ پڑھا مثل منصور!
حُسن کا کس کے خریدار سرِ دار ہوا
کون وہ زہرہ جبیں ہے ، جو ہے اس کا دلدار
کِس کا غم اُس کے دل و جاں میں شرر بار ہوا
کس کی الفت نے بنا رکھا تھا دیوانہ اسے
اتنا کیوں تڑپا کہ چرچا سرباز ہوا
اس کا میخانہ بھی دنیا سے نِرالا ہوگا !
دھر میں جس کا جنوں عقل کا معیار ہوا
مسجد اور مدرسے جب عشق کا مکتب نہ رہے
غیرتِ قیس تھا وہ ، دونوں سے بیزار ہوا
جامۂ زہد و ریا بار نہ کیوں کر ہوتا ؟!!
جب ’’تقدّص‘‘ سببِ دوریٔ دلدار ہوا
مل گیا اس کو خرابات میں اپنا مقصود !
جس قدر ڈوب کے پی اتنا ہی ہوشیار ہوا
وعظ کیا کرنے چلا ناصحِ ناداں اس کو !!
خود ہی دنیا کی ملامت کا سزاوار ہوا
جانِ میخانہ تھا جب اس پہ مصائب ٹوٹے
رِند تو رِند ہیں ساقی بھی مددگار ہوا !!
کون بت خانہ ہے وہ یاد میں جسکی گم ہے
بُت شکن ہوکے وہ کس بت کا پرستار ہوا
کیسے اصنام ہیں کس دیر کے وہ باسی ہیں !
جن کے اعجاز سے وہ خواب سے بیدار ہوا
گفتگو اس کی ہے مخصوص زباں میں شاید
یعنی وہ لہجۂ عرفاں میں گھر بار ہوا !
ہاں ! فقط حسنِ ازل ہے ، جو ہے اسکا محبوب
سرمدی نور ہے جسکا وہ طلب گار ہوا !
جلوۂ حق ہے وہ جس کے لئے بیتاب رہا
عشقِ معبود ہے بس ، جس سے وہ سرشار ہوا
حق کے متوالے اسے کیوں نہ کہیں اپناً امامً
حق پرستی کا جو اِک مرکزی کردار ہوا
آج وہ قربِ الہی میں بڑ ے چین سے ہے !
حق پہ جاں دے کے اس انعام کا حقدار ہوا
اسکی تربت پہ دل افگاروں کے بے پایاں سلام !
قبر میں سو کے بھی جو قبلۂ احرار ہوا !!
اس رثائی نظم کے درمیانی ۱۴اشعار حضرتِ امام قدس کی عارفانہ غزل کی روشنی میں کہے گئے ہیں ۔
سید محمد ظفر الحسینی (ہندوستان)