اے مجاہد، اے شہیدِ آستانِ انقلاب
دی فصیلِ ظلم سے تونے اذانِ انقلاب
کم نہ ہونے دیں گے ہم تیرے لہو کی آبرو
سرخ رکھیں گے ہمیشہ آسمانِ انقلاب
عالمِ انسانیت بیدار ہے، اے شیخِ نِمْرْ
بن گئی تیری شہادت ترجمانِ انقلاب
کُہنِیوں تک خونِ تازہ کی لکیریں ہیں گواہ
دستِ قاتل میں بندھی ہے ریسمانِ انقلاب
اک تبسم بھی خلافِ ظلم ہوتا ہے جہاد
بےزباں بھی بول سکتے ہیں زبانِ انقلاب
خوں کا دریا آرہا ہے قصرِ باطل کی طرف
تم سے رُک پائے تو روکو کاروانِ انقلاب
پھر سے ہم کو اک نئی تاریخ کرنی ہے رقم
پھر ہمارا منتظر ہے اک جہانِ انقلاب
اے خمینی آج تک تیروں سے چھلنی ہے ستم
آپ نے کڑکائی تھی اک دن کمانِ انقلاب
اے امینِ عصرِ غیبت، خامنہ ای مرحبا
آپکے ہاتھوں میں زیبا ھے نشانِ انقلاب
حق نویسی سے ہی ملتا ہے قلم کو اعتبار
اے شفیع، اے شاعرِ شعلہ بیانِ انقلاب
سید شفیع حیدر بھیک پوری – ہندوستان
۷ فروری ۲۰۱۸ء