ہر جنگ ایک دن ختم ہوتی ہے،دشمن کے خوف سے خاموشی خیانت ہے:آیت اللہ سید حسن خمینی
جماران نیوز ایجنسی کی رپورٹ کے مطابق، آیتالله سید حسن خمینی نے کہا ہے کہ ہر جنگ ایک دن ختم ہوتی ہے اور ایران نے ایک ’’باعزت جنگ‘‘ پیچھے چھوڑی ہے۔ انہوں نے ماہرین اور سیاست دانوں پر زور دیا کہ وہ خوف یا ذاتی مفاد کی وجہ سے حق بات کہنے سے گریز نہ کریں۔
ایرانی صدر اور حکومتی ارکان کی امام خمینی کے نظریات سے تجدیدِ عہد کی تقریب سے خطاب کرتے ہوئے سید حسن خمینی نے کہا کہ حالیہ جنگ میں ایرانی فوج، پاسدارانِ انقلاب، بسیج اور سکیورٹی فورسز نے اہم کردار ادا کیا، جبکہ حکومت نے بھی مشکل حالات میں نمایاں ذمہ داریاں ادا کیں۔
انہوں نے کہا کہ ملک پر مختلف سمتوں سے آنے والا دباؤ معمولی نہیں تھا اور خطے کے کسی بھی ملک پر اس دباؤ کا ایک دسویں حصہ بھی پڑتا تو اس کی حکومت مشکلات سے دوچار ہو سکتی تھی۔
سید حسن خمینی نے کہا کہ دشمن ایران کو کچلنا، ملک کو ٹکڑے ٹکڑے کرنا اور اسے تقسیم کرنا چاہتا تھا، لیکن وہ اپنے مقاصد میں کامیاب نہیں ہوا۔
ان کے مطابق، اسلامی جمہوریہ کو ختم کرنے کی کوشش بھی کامیاب نہیں ہوئی بلکہ نظام مزید مضبوط ہو کر سامنے آیا۔
انہوں نے کہا کہ معاشرے کے ایک بڑے حصے کو دشمن داخلی جنگ کی طرف دھکیلنا چاہتے تھے، لیکن عوام نے دشمن کے منصوبے کا حصہ بننے کے بجائے انقلاب کی قوتوں کے ساتھ تعاون اور یکجہتی کا مظاہرہ کیا۔
سید حسن خمینی نے کہا کہ جنگ کے دوران ملک نے جس مرحلے کا سامنا کیا، اس کے بارے میں آنے والی نسلیں فوج، پاسدارانِ انقلاب، بسیج اور پولیس کی خدمات کو یاد رکھیں گی۔
انہوں نے کہا کہ اب جنگ کے دور کی ذمہ داریوں کے بجائے حکومت کی توجہ عوام کی زندگی، معیشت اور روزمرہ مسائل پر مرکوز ہونی چاہیے۔
ان کا کہنا تھا کہ ایران کے دشمن اب ملک کو اندرونی طور پر اقتصادی انتشار کا شکار بنانے کی کوشش کر رہے ہیں، اس لیے حکومت اور متعلقہ اداروں کو اقتصادی استحکام پر خصوصی توجہ دینا ہوگی۔
سید حسن خمینی نے ماہرین اور سیاست دانوں کی ذمہ داری پر بات کرتے ہوئے کہا کہ جو لوگ حق کو جانتے ہوئے بھی خاموش رہتے ہیں اور اپنی مہارت و تخصص کو معاشرے کے لیے استعمال نہیں کرتے، وہ اپنی ذمہ داری پوری نہیں کر رہے۔
انہوں نے کہا کہ جو ماہرین ضرورت کے وقت خوف یا لالچ کی وجہ سے خاموش رہتے ہیں، وہ خیانت کرتے ہیں۔
ان کے مطابق ایسے سیاست دان بھی اپنی ذمہ داری سے خیانت کرتے ہیں جو گالی یا مخالفت کے خوف سے اپنی ماہرینانہ رائے بیان نہیں کرتے، کیونکہ بعض اوقات خاموش رہنا بھی جھوٹ بولنے کے مترادف ہوتا ہے۔
انہوں نے زور دیا کہ موجودہ حالات میں ملک کو ایسے ماہرین اور ذمہ دار افراد کی ضرورت ہے جو دباؤ سے بالاتر ہو کر حقیقت پر مبنی رائے پیش کریں۔